Cultura a la curt

Cultura a la curt
1600 onns istorgia culturala sacrala!

Cultura a la curt

La curt episcopala era abitada gia dal temp preroman. Da la midada da l’antica tardiva al temp medieval tempriv è ella daventada la sedia da l’uvestg. Sch’ins visita la catedrala ed il Museum dal Stgazi da la catedrala sin la curt, pon ins vesair a moda impressiunanta prest 1600 onns istorgia culturala sacrala.

La catedrala

L’ovra da la romanica tardiva è in monument cultural d’impurtanza naziunala. Ella è vegnida inaugurada l’onn 1272 suenter in temp da construcziun da passa tschient onns. Ultra da la sculptura architectonica è remartgabel era ses ritg equipament.

Il deposit public

Ils bains culturals da la Fundaziun Catedrala vegnan magasinads en in deposit che la publicitad po contemplar a chaschun da visitas guidadas (davent da l’enviern 2024). Il deposit è er accessibel per intents scientifics.

La sala da chavaliers

La sala da chavaliers da la mesadad dal 17avel tschientaner è la pli gronda stanza dal chastè e serva fin oz sco stanza d’accoglientscha represchentativa. La galaria dals purtrets d’uvestgs en la sala represchenta in punct culminant en l’istorgia da la cultura.

L’archiv episcopal

L’archiv episcopal a Cuira dat perditga da la vita ecclesiastica da l’uvestgieu da Cuira ch’è documentada dapi l’onn 451. Dapi l’otgavel/il 10avel tschientaner vegnan magasinads qua – a moda ordinada e registrada – objects d’archiv custaivels davart l’istorgia da l’uvestgieu da prest 1600 onns.

Il restaurant Hofkellerei

Sin la curt espiscopala, pli precis en la tur dal portal, sa chatta il restaurant Hofkellerei renovà dacurt cun sia stiva da baiver gotica. La sala en il pli vegl restaurant da Cuira porscha plazza a 60 persunas ed in ambient grondius per Vossa festa.

La baselgia di Son Gliezi

En l’otgavel tschientaner è vegnida construida sur in bajetg dal temp medieval tempriv ina baselgia da trais apsidas cun il patrocini da Son Gliezi, il sontg da l’uvestgieu. Sa mantegnida da quest bajetg è la cripta en rintg. La baselgia fa part dal seminari da spirituals.

La baselgia di Son Steffan

La baselgia sutterrana da Son Steffan è in dals pli impurtants monuments architectonics dal cristianissem tempriv en il Grischun: en il tschintgavel tschientaner serviva ella sco baselgia sepulcrala dals uvestgs da Cuira. La baselgia è vegnida rescuverta l’onn 1850 cun construir l’emprima scola chantunala. Dapi il 2010 è ella accessibla a la populaziun.

Il pajais medieval

Bainvegni al grond gieu dal temp medieval. Il gieu lascha reviver en pliras etappas il ritg patrimoni cultural dal temp medieval en las valladas grischunas. Cumenzai sin la curt cun l’engiavinera davart la catedrala ed il Museum dal Stgazi da la cadedrala. In’ulteriura staziun sa chatta en il Museum retic .

Scuvrir la cultura

Vulais Vus emprender d’enconuscher il bain cultural da la curt episcopala en il rom d’ina visita guidada publica? Per exempel durant visitas guidadas en il Museum dal Stgazi da la catedrala, en la catedrala u en connex cun Son Steffan. Bler plaschair sin Vossas turas d’exploraziun tras l’istorgia da l’uvestgieu da prest 1600 onns!