Maletgs da la mort u sauts dals morts?
Ils maletgs da la mort da Cuira
Il ciclus da maletgs da la mort dal 1543 consista da 25 tavlas picturadas sin ina paraid a travs cun trais registers. Las represchentaziuns mussan inscunters d’umans cun la mort. Ellas èn creadas cun la tecnica da grisaglia, quai vul dir che l’artist ha utilisà surtut ils tuns grisch, nair ed alv. En la zona dal sochel sa chattan animals davos artgs engiatrads. Ils maletgs da la mort dal Stgazi da la catedrala da Cuira stattan en la tradiziun dals sauts dals morts medievals. En quests ciclus da maletgs vegnan confruntads cun la mort umans da tut las classas socialas e da tut las vegliadetgnas. La mort è represchentada sco skelet che sauta e fa savens era musica. Ils maletgs da Cuira na mussan dentant betg la mort che sauta cun ils umans, mabain la mort che surprenda els en lur mintgadi ed als sdrappa or da la vita. Quai è il motiv, pertge ch’i na sa tracta a Cuira betg da sauts dals morts, mabain da maletgs da la mort. Els sa basan sin la retscha d’entagls da lain ‹Bilder des Todes› da Hans Holbein il Giuven ed èn las emprimas copias en format grond da las pitschnas graficas dal temp avant il 1526.
Ils maletgs da la mort dal Stgazi da la catedrala da Cuira èn in’ovra independenta d’auta qualitad artistica. Cun excepziun da las duas represchentaziuns da la mort dal temp enturn il 1520 fin il 1530 en l’ossari da Leuk sa tracti dal pli vegl ciclus mantegnì en la tradiziun dals sauts dals morts en Svizra. El è sa mantegnì cumplettamain cun excepziun da la scena da l’abadessa. Ils motivs n’èn ni vegnids surmalegiads ni surtratgs cun colur alva.
