Tge è atgnamain in stgazi da la catedrala?
Il stgazi da la catedrala
In stgazi da la catedrala consista en emprima lingia da reliquias. Quai èn restanzas da corps d’in sontg u er objects ch’èn stads en contact cun sontgs. Ina da las pli veglias furmas dal cult dals sontgs è il cult da reliquias. Quant impurtantas che las reliquias eran mussan ils reliquiaris, damai las chaschinas preziusas che tegnan en salv las reliquias. In stgazi da la catedrala cumpiglia sper las reliquias ulteriuras custaivladads ch’èn sa rimnadas en il decurs dals tschientaners en ina catedrala, per exempel objects liturgics duvrads en il servetsch divin sco chaleschs, chantinas da vin e d’aua u intschensers.
La diversitad dals objects dal Stgazi da la catedrala da Cuira permetta da divider l’exposiziun en il plaunterren en differents champs tematics. In pau sco da traversar ina catedrala dal vest a l’ost pudais Vus contemplar ils objects exponids en ina graduaziun tematica. Quella cumenza cun la part dals objects profans e cuntinuescha alura cun l’istorgia da l’uvestgieu da Cuira che exista dapi var 1600 onns. Sco terz champ As preschenta la chombra dal stgazi sco tala objects liturgics custaivels che vegnan utilisads per la sontga Messa. E la finala cuntanschais Vus il punct culminant da l’exposiziun, il stgazi da reliquias da la catedrala.
